Нямецкае выданьне Bild паведамляе, што мігранцкі крызіс на мяжы Беларусі з ЭЗ зноў абвастраецца, цяпер мігранцкая плынь ідзе з Лібіі.
«Крызіс на мяжы ЭЗ зь Беларусьсю. Дыктатар і паплечнік Пуціна Аляксандр Лукашэнка ўсё часьцей выкарыстоўвае ўцекачоў як зброю на ўсходняй мяжы ЭЗ. Яго мэта — дэстабілізаваць палітычную сытуацыю ў Нямеччыне. Таму на польскіх межах цяпер трывога. Апошнія некалькі дзён сталі выпрабаваньнем для Польшчы», — піша Bild.
Ціск на мяжы штодня ўзрастае, піша выданьне. У мінулы чацьвер зафіксавана 115 незаконных спробаў перасячэньня мяжы. За выходныя (зь пятніцы па нядзелю) 390 мігрантаў былі вернутыя назад. Толькі ў панядзелак 185 мігрантаў спрабавалі прарваць памежныя бар’еры. Іх спынілі і адкінулі назад, паведамляе нямецкае выданьне.
У 2025 годзе ўжо было перадухілена 20 583 спробаў незаконных мігрантаў трапіць у ЭЗ зь Беларусі.
Вонкавую мяжу ЭЗ з Беларусьсю павінны абараняць платы, бесьпілётнікі і дастатковая колькасьць пэрсаналу, піша выданьне, але менавіта гэтага і не хапае — групоўкам пастаянна ўдаецца прарывацца празь яе або ўчыняць напады, паведамляе Bild.
Выданьне піша, што памяняліся маршруты нелегальнай міграцыі. Маршрут мігрантаў ідзе цяпер праз Маскву (Расея), Доху (Катар), Стамбул (Турэччына), дадаўся Бэнгазі (Лібія). Мігранты ляцяць у Менск.
«Адтуль Лукашэнка загадвае адмыслова перавозіць іх да мяжы ў аўтобусах, з прыладамі ў багажы для нападаў на памежнікаў», — паведамляе Bild.
У цяперашні час з Турэччыны ў Беларусь штотыдзень ляціць 78 пасажырскіх самалётаў — у красавіку іх было толькі 20. Паводле зьвестак Bild, беларуская авіякампанія «Белавія» пачала рэгулярныя рэйсы зь Менску ў Бэнгазі. 18 чэрвеня гэтым маршрутам упершыню паляцеў нядаўна набыты самалёт.
«Амаль кожны чалавек у групах, якія прыбываюць на вонкавыя межы ЭЗ, размаўляе па-расейску»,— паведамілі выданьню яго крыніцы. Многія мігранты надзвычай агрэсіўныя, напады на памежнікаў пачашчаюцца. Большасьць іх — маладыя мужчыны ва ўзросьце ад 25 да 40 гадоў.
Фэдэральны міністар унутраных справаў Аляксандар Добрынт занепакоены эскаляцыяй сытуацыі на мяжы. Ён дае зразумець:
«Польшча абараняе ня толькі сваю мяжу з Беларусьсю, але і вонкавую мяжу Эўропы».
Урад у Варшаве, паводле Добрынта, робіць «выдатную працу. Польшча заслугоўвае ня толькі павагі, але і большай падтрымкі ад усёй Эўропы».
У наступны панядзелак Добрынт мае намер накіравацца на польска-беларускую мяжу для канфідэнцыйнай крызіснай сустрэчы. Bild даведаўся пра гэта з урадавых колаў у Бэрліне і Варшаве. Прэс-сакратарка міністра пацьвердзіла гэта.
Мігранцкі крызіс 2021-2025. Асноўнае
- У ліпені 2021 году Аляксандар Лукашэнка заявіў, што з прычыны санкцыяў Беларусь больш ня будзе стрымліваць нелегальную міграцыю ў краіны Эўразьвязу. Найперш вялікія патокі мігрантаў накіраваліся ў Літву, па стане на верасень — звыш 4,2 тысячы чалавек з краінаў Азіі і Афрыкі. Затым напружаньне на сваіх межах адчулі Латвія і Польшча.
- Рэагуючы на крызіс, Літва і Польшча пачалі будаваць сьцяну на мяжы зь Беларусьсю.
- Урады Літвы, а затым Латвіі і Польшчы, улетку 2021-га зрабілі істотна больш строгім заканадаўства аб нелегальным перасячэньні дзяржаўнай мяжы, а таксама выслалі ў памежныя зь Беларусьсю раёны падмацаваньне з вайсковых злучэньняў. Лукашэнку абвінавацілі ў спрыяньні нелегальнай міграцыі ў краіны Эўразьвязу.
- У Літве ў лягерах для ўцекачоў мігранты неаднаразова ладзілі бунты і намагаліся зьбегчы.
- Улады Польшчы зь верасьня распачалі затрыманьні і дэпартацыі людзей, якія дапамагаюць мігрантам нелегальна перасякаць мяжу. Сярод іх як грамадзяне Польшчы, так і грамадзяне Беларусі, краінаў Азіі, у тым ліку некаторыя асобы, што маюць від на жыхарства ў краінах Эўразьвязу.
- Прэм’ер-міністар Польшчы Матэвуш Маравецкі выказаў упэўненасьць, што сцэнар «гібрыднай агрэсіі» супраць Эўразьвязу быў распрацаваны Менскам не самастойна, а ў шчыльнай супрацы з Масквой.
- Прэс-сакратар каардынатара спэцслужбаў Польшчы Станіслаў Жарын 27 верасьня заявіў, што 20% затрыманых мігрантаў маюць сувязі з Расеяй, пра што сьведчаць знойдзеныя доказы. Міністар унутраных спраў і адміністрацыі Мар’юш Каміньскі сказаў, што беларускія памежнікі даюць мігрантам псыхатропныя сродкі, у тым ліку дзецям.
- 30 верасьня ПАРЭ катэгарычна асудзіла практыку вяртаньня мігрантаў «у трэцюю краіну, дзе ім ня можа быць гарантавана міжнародная абарона», і нагадала Латвіі, Літве і Польшчы пра забарону на калектыўную высылку іншаземцаў.
- 8 кастрычніка Варшава заявіла, што трактуе паводзіны беларускага боку як «агрэсіўныя дзеяньні супраць Польшчы». Зьявіўся шэраг відэадоказаў, што беларускія памежнікі ня толькі не спыняюць мігрантаў, але і актыўна дапамагаюць ім нелегальна перасякаць польскую мяжу.
- На межах Беларусі з Польшчай і Літвой ад пачатку міграцыйнага крызісу загінулі сама меней 9 чалавек.
- 8 лістапада раніцай на мяжы зь беларускага боку заўважылі буйную калёну зь некалькіх сотняў мігрантаў, якія рушылі ў суправаджэньні ўзброеных сілавікоў да калючага дроту на мяжы з Польшчай, намагаючыся перасекчы мяжу. Паводле розных ацэнак, іх колькасьць была ад 2 да 4 тысяч чалавек. Многія атрымалі візы ў беларускім дыпляматычным прадстаўніцтве ў Анкары, турэцкія авіякампаніі ўдзельнічаюць у перакіданьні мігрантаў у Беларусь.
- У наступныя дні мігранты пры спрыяньні беларускіх сілавікоў сталі лягерам на памежнай паласе. Курд з Іраку Рэбаз Наджм Хама Саід сказаў Свабодзе, што беларуская міліцыя дапамагае высякаць дрэвы для вогнішчаў на беларускай жа тэрыторыі. Некаторым групам удалося прарвацца на польскую тэрыторыю, але вайскоўцы затрымалі ўсіх парушальнікаў.
- 10 лістапада эўрадэпутат Радаслаў Сікорскі заявіў, што крызіс на мяжы ініцыяваны пры падтрымцы Масквы, а Лукашэнку трэба прызнаць тэрарыстам і выдаць Міжнароднаму трыбуналу. Шэраг іншых эўрапейскіх палітыкаў таксама выказалі ўпэўненасьць, што Пуцін з дапамогай Лукашэнкі расхіствае Эўропу, пачуліся заклікі да ЭЗ дзейнічаць актыўна, а не чакаць.
- 11 лістапада ў паветранай прасторы Беларусі пачалі патруляваць межы расейскія бамбавікі Ту-22М3. Яны належаць паветрана-касьмічным сілам Расеі.
- 11 лістапада Фэдэральная паліцыя Нямеччыны заявіла, што толькі за першыя дні лістапада ў краіну трапілі больш за тысячу мігрантаў, якія выкарысталі Беларусь як краіну транзыту.
- Са жніўня польскія памежнікі спынілі больш за 33 тысячы спробаў нелегальнага перасячэньня мяжы з боку Беларусі, летась іх было 88.
- 15 лістапада больш за 3 тысячы мігрантаў сабраліся на беларускім памежным пераходзе «Брузгі» перад лініяй польскай мяжы, умацаванай часовымі загародамі і шарэнгай польскіх вайскоўцаў.
- Па словах прэс-сакратара Лукашэнкі Натальлі Эйсмант, у Беларусі агулам каля 7 тысяч мігрантаў, якія спадзяюцца трапіць у Нямеччыну.
- 22 лістапада ў Бэрліне адмовіліся прымаць каля 2 тысяч чалавк з Блізкага Ўсходу, якія прыбылі ў Беларусь пасьля арганізацыі рэжымам Лукашэнкі мігранцкага крызісу.
- 25 лістапада мігранты правялі акцыю пратэсту на памежжы, заяўляючы, што ня хочуць вяртацца назад у свае краіны.
- На больш чым дзесяці эвакуацыйных рэйсах у Ірак і Сырыю ў лістападзе-сьнежні Беларусь пакінулі каля 4,5 тысяч мігрантаў.
- На пачатку 2022 году сталі вядомыя тэрміны пабудовы агароджаў на мяжы зь Беларусьсю. Польшча адзначыла, што агароджу дабудуюць да канца чэрвеня, а Літва, што да восені.
- За 2023 год памежнікі суседніх зь Беларусьсю краін Эўразьвязу спынілі 42 тысячы спробаў нелегальнага пранікненьня на сваю тэрыторыю, што на траціну больш за 2022 год.
- Шараговец 1-й Варшаўскай бранятанкавай брыгады Матэвуш Сітэк, паранены нажом 28 траўня 2024 году на мяжы зь Беларусьсю, памёр 6 чэрвеня ў Варшаве. Раненьне вайсковец атрымаў падчас спыненьня спробы групы мігрантаў прарвацца праз сталёвую загароду зь беларускага боку. Калі салдат блякаваў пралом у сталёвай агароджы на мяжы з дапамогай ахоўнага шчыта, мігрант, прасунуўшы руку праз плот, нанёс яму ўдар нажом, прывязаным да палкі, у грудзі. Нож затрымаўся ў целе жаўнера. У бок пацярпелага і памежніка, які дапамагаў яму, кідалі палкі і камяні.
Форум