14 ліпеня 2021 года затрымалі вясноўцаў Уладзімір Лабковіч, Алесь Бяляцкі і Валянцін Стэфановіч. У чацьвёртую гадавіну іх адвольнага затрыманьня Міжнародная арганізацыя правоў чалавека, Абсэрваторыя па абароне праваабаронцаў і яшчэ 30 арганізацыяў выступілі з сумеснай заявай, у якой заклікалі беларускія ўлады да неадкладнага і безумоўнага вызваленьня ўсіх сябраў праваабарончага цэнтра «Вясна», а таксама ўсіх іншых праваабаронцаў, адвольна затрыманых у Беларусі.
Асуджаныя па сфабрыкаваных і палітычна матываваных абвінавачваннях, адзначаецца ў заяве, праваабаронцы «Вясны» знаходзяцца ў жорсткіх умовах утрыманьня ды зьведваюць жорсткае абыходжаньне:
«Рэпрэсіі супраць „Вясны“ і яе чальцоў зьяўляюцца часткай больш шырокіх рэпрэсій супраць грамадзянскай супольнасьці ў Беларусі, асабліва пасьля масавых пратэстаў супраць сфальсыфікаваных прэзыдэнцкіх выбараў 2020 года. Пасьля пратэстаў улады закрылі ўсе праваабарончыя і іншыя незалежныя арганізацыі, у выніку чаго ў краіне не засталося ніводнай легальна дзеючай праваабарончай няўрадавай арганізацыі. Па стане на 2 ліпеня 2025 года ў Беларусі па палітычных матывах застаюцца як мінімум 1164 асобы».
Арганізацыі таксама асуджаюць рэпрэсіі ў Беларусі, якія працягваюцца, і падкрэсьліваюць, што палітычна матываваныя, адвольныя перасьледы і жорсткае абыходжаньне з праваабаронцамі ў Беларусі мусіць спыніцца.
Яны таксама заклікаюць да міжнароднай адказнасьці ды неадкладнага спыненьня ўсіх формаў палітычна матываванага перасьледу, уключна з эскаляцыяй транснацыянальных рэпрэсій, накіраваных супраць беларускіх праваабаронцаў і грамадзянскай супольнасьці агулам, як у Беларусі, так і за мяжой.
Акрамя гэтага, падпісанты заклікаюць улады Беларусі забясьпечыць умовы, у якіх праваабаронцы могуць ажыцьцяўляць сваю законную дзейнасьць, не асьцерагаючыся рэпрэсій, без любых абмежаваньняў або прымусовай высылкі.
ГЛЯДЗІЦЕ ТАКСАМА: У Вільні патрабавалі вызваленьня Алеся Бяляцкага і іншых вясноўцаў у 4-ю гадавіну іх арышту. ФОТАПерасьлед Праваабарончага цэнтру «Вясна»
Па стане на 3 сакавіка 2024 году, за кратамі знаходзяцца 5 праваабаронцаў «Вясны».
- Алесь Бяляцкі, старшыня «Вясны», затрыманы 14 ліпеня 2021. Падчас ягонага зьняволеньня, 7 кастрычініка 2022 году, Алесю Бяляцкаму была прысуджаная Нобэлеўская прэмія міру. 3 сакавіка 2023 году яго асудзілі на 10 гадоў калёніі. Бяляцкага прызналі вінаватымі ў «кантрабандзе грошай арганізаванай групай» у 2016–2021 гадах (ч. 4 арт. 228 КК) і «фінансаваньні пратэстаў» у 2020-м (ч. 2 арт. 342 Крымінальнага кодэксу).
- Валянцін Стэфановіч, намесьнік старшыні «Вясны» і віцэ-прэзыдэнт FIDH, затрыманы 14 ліпеня 2021-га. 3 сакавіка 2023 году яго асудзілі на 9 гадоў зьняволеньня. Яго прызналі вінаватымі ў «кантрабандзе грошай арганізаванай групай» у 2016–2021 гадах (ч. 4 арт. 228 КК) і «фінансаваньні пратэстаў» у 2020-м (ч. 2 арт. 342 Крымінальнага кодэксу).
- Уладзімер Лабковіч, юрыст «Вясны», затрыманы 14 ліпеня 2021 г. 3 сакавіка 2023 году яго асудзілі на 7 гадоў зьняволеньня. Яго прызналі вінаватымі ў «кантрабандзе грошай арганізаванай групай» у 2016–2021 гадах (ч. 4 арт. 228 КК) і «фінансаваньні пратэстаў» у 2020-м (ч. 2 арт. 342 Крымінальнага кодэксу).
- Марфа Рабкова, праваабаронца «Вясны», затрыманая 17 верасьня 2020 году. Ёй прысудзілі 15 гадоў калёніі ва ўмовах агульнага рэжыму і штраф у памеры 700 базавых велічыняў (22 400 беларускіх рублёў, або звыш 8800 даляраў) паводле ч. 3 арт. 293 Крымінальнага кодэксу («навучаньне ці іншая падрыхтоўка асобаў для ўдзелу ў масавых беспарадках, альбо фінансаваньне такой дзейнасьці»), ч. 3 арт. 130 («распальваньне сацыяльнай варожасьці да ўлады») і ч. 2 арт. 285 КК («ўдзел у злачыннай арганізацыі»). 28 лютага 2023 году Вярхоўны суд Беларусі разгледзеў апэляцыйную скаргу ў справе Рабковай. Тэрмін зьняволеньня скарацілі на тры месяцы.
Выйшлі на волю:
- Тацьцяна Ласіца, валянтэрка «Вясны» з Гомля, затрыманая 21 студзеня 2021. Паводле артыкулу аб масавых беспарадках за кратамі прабыла 1 год і 8 месяцаў. Праваабаронца не адбыла ўвесь тэрмін.
- Леанід Судаленка, дырэктар гомельскага аддзяленьня «Вясны», затрыманы 18 студзеня 2021-га. Паводле артыкулу аб масавых беспарадках яго пакаралі на 3 гады зьняволеньня. Выйшаў на волю. адбыўшы ўвесь тэрмін.
- Андрэй Чапюк, валянтэр «Вясны» зь Менску, затрыманы 2 кастрычніка 2020-га. Яго абвінавачвацілі ва ўдзеле ў масавых беспарадках і ўдзеле ў злачыннай арганізацыі. Чапюка асудзілі на 6 гадоў калёніі ва ўмовах узмоцненага рэжыму і пакаралі штрафам у памеры 500 базавых велічыняў (16 000 беларускіх рублёў ці больш за 6 300 даляраў). Выйшаў на волю 18 красавіка 2025 году.